Giila sa Quick Response Team sa Philippine Institute of Volcanology and Seismology (PHIVOLCS-DOST) ang fault nga maoy nakaingon sa makagun-ob nga magnitude 6.9 nga linog sa Sugbo niadtong Martes sa gabii, Septiyembre 30.
Matod sa ahensya, nakit-an sa team ang onland extension sa fault duol sa Sitio Looc, Barangay Nailon sa Bogo City, nga maoy labing grabeng naigo sa linog.
Ginganlan sa ahensya ang bag-ong fault nga Bogo Bay Fault.
Sa pagkakaron, ang Phivolcs nakatala na og kapin sa 4,300 ka aftershocks sukad sa pag-igo sa magnitude 6.9 nga linog. Nagkalainlain sila sa kusog gikan sa 1.0 hangtod 5.1.
Padayon usab nga nagpahimangno ang ahensiya sa publiko nga magpabiling alerto tungod kay bisan og gipaabot nga mohinay ang kakusog ug frequency sa natala nga aftershocks, posible gihapon nga makatala og kusog nga aftershocks.
