Nagpasidaan ang Philippine Institute of Volcanology and Seismology (PHIVOLCS) bahin sa posibleng pagsaka sa status sa Bulkang Mayon ngadto sa Alert Level 4, tungod sa nagpadayon ug nagkakusog nga kalihokan niini human sa natala nga pagbuto.
Matod ni PHIVOLCS Director Dr. Teresito Bacolcol, bisan pa man nga anaa pa sa Alert Level 3 ang bulkan, nagpadayon gihapon ang pag-alburuto niini—lakip na ang usa ka gamay nga Strombolian eruption nga milungtad og 41 ka segundo ug nagpatungha og aso o abo nga miabot sa gitas-on nga 300 metros.
Gipunting sa opisyal nga usa sa mga nag-unang timailhan nga ilang hugot nga gibantayan mao ang Real-Time Seismic Amplitude Measurement (RSAM), nga nagsukod sa kasagarang kakusgon sa mga natala nga seismic signal sulod sa piho nga mga yugto sa panahon.
Gipasiugda ni Bacolcol nga ang RSAM ug uban pang mga sukaranan mahitungod sa bulkan nagsilbing nag-unang basehan sa ahensya aron mahibal-an kung angay na bang ipataas ang alert status ngadto sa Level 4.
Bisan pa niana, gipasabot sa direktor nga base sa kasamtangang datos ug mga kondisyon sa palibot sa bulkan, nagpabilin kini sa Alert Level 3 sa pagkakaron.
Kahinumdoman nga gipataas sa PHIVOLCS ang alert status sa bulkan niadtong Oktubre 30, human sa usa ka kasarangan nga pagbuto nga nagtukmod sa pagpatuman sa gikinahanglan nga mga lakang sa pag-amping.
