Laing pagbuga og abo gikan sa Bulkang Mayon sa Albay ang natala karung Martes sa buntag, Nobyembre 3.
Sumala sa Philippine Institute of Volcanology and Seismology (PHIVOLCS), nagsugod ang pagbuga sa abo dakong alas-8:22 sa buntag, diin mikabat sa 1,600 metros ibabaw sa crater sa bulkan ang gihabogon sa abo.
Gidala sa hangin ang abo paingon sa habagatan-kasadpan nga bahin.
Samtang nagpadayon ang pagmonitor sa PHIVOLCS, nagpabilin sa Alert Level 3 ang kahimtang sa Bulkang Mayon.
Hugot gihapong gidili ang pagsulod sulod sa unom ka kilometrong Permanent Danger Zone (PDZ) palibot sa bulkan tungod sa posibleng mga peligro nga dala sa padayon nga aktibidad niini.
Gipahimangnoan usab ang mga residente sa mga lugar nga posibleng maapektuhan sa pagbuga sa abo nga mag-amping ug mosunod sa mga pahimangno sa mga awtoridad.
