CEBU CITY- Gidakop sa mga sakop sa National Bureau of Investigation (NBI)–Cybercrime Division ang content creator nga si Mike Romero, human sa iyang social media post nga giingong posibleng hulga batok kang Presidente Ferdinand Marcos Jr.
Nasikop si Romero sa iyang pinuy-anan sa Pagadian City subay sa surveillance nga gihimo sa NBI, human niya i-post ang usa ka hulagway sa presidente nga gi-edit sa graphic nga nagpunting og pula nga pana gikan sa pulong nga “Bogo” paingon sa ulo ni Marcos, uban ang caption nga “Headshot.”
Ang hulagway ni Marcos gikuha samtang anaa sa Bogo City, Cebu, nga bag-ohay lang naigo sa linog.
Sumala ni NBI Director Jaime Santiago, bisan og aduna tay kagawasan sa pagsulti ug pagpahayag, kini adunay limitasyon, ilabi na kung ang mensahe mosangpot sa hulga sa kinabuhi sa mga opisyal sa gobyerno.
Giklaro sa NBI nga ang ilang aksyon batok kang Romero nagtumong sa posibleng intensyonal nga hulga, ug dili lang ordinaryong pamahayag.
Giila usab ni Romero nga siya ang tag-iya sa Facebook account human siya gikompronta sa mga otoridad, maong dayon siyang gidakop ug gidala sa kustodiya.
Matod sa NBI, ang buhat ni Romero posibleng makonsiderar nga kalapasan sa Article 142 sa Revised Penal Code (Inciting to Sedition), in relation to the Cybercrime Prevention Act of 2012.
Human sa insidente, nipasidaan ang NBI sa publiko batok sa pag-post og malicious o provocative content sa social media nga mahimong makahatag ug hulga sa kinabuhi o dignidad sa mga opisyal sa estado.
Sa konteksto sa pinulongang Binisaya, ang pulong nga “Bogo” kasagarang gamiton nga insulto ug nagpasabot og “walay utok” o “ignorante,” hinungdan nga gitutokan kini sa imbestigasyon isip personal nga pag-atake.
