Nagpadayon ang paghatod sa medikal nga serbisyo sa tanan 16 ka tambalanan sa Probinsiya sa Sugbo, bisan pa sa magnitude 6.9 nga linog nga miigo sa amihanang bahin niadtong Setyembre 30.
Sumala ni Dr. Nikki Catalan, Public Health Consultant sa Kapitolyo, na-stabilize na ang suplay sa kuryente, tubig, tambal ug kagamitan sa mga ospital nga naapektuhan sa linog.
Ang Cebu Provincial Hospital (CPH) sa Bogo City nakasinati og kadaot sa operating, emergency, ug delivery rooms, hinungdan nga gibutang og mga temporaryong tents aron ma-accommodate ang mga pasyente nga nabalaka sa mga aftershocks.
Samtang sa Juan B. Dosado Memorial Hospital sa Sogod, tulo ka andana nga building ang gideklarar nga off-limits, samtang ang Daanbantayan ug Bantayan District Hospitals nagkinahanglan og repair sa ilang mga pasilidad.
Gibalhin usab ang mga pasyente nga nanginahanglan espesyal nga pag-atiman sa ubang ospital, lakip na ang Vicente Sotto Memorial Medical Center nga nakadawat og 89 ka pasyente, CPH Danao (51), CPH Balamban (22) ug UCMed (37).
Kadaghanan sa kaso mga bali ug traumatic injuries, samtang walo ka libreng orthopedic operations ang gihimo sa CPH Balamban.
Samtang, ang DPWH nagpasalig sa pag-ayo sa kadaot sa CPH Bogo, ug mga psychologist group naghatag og debriefing sessions alang sa mga pasyente ug medical staff sa Bogo City.
