Gitukod sa Department of Science and Technology – Philippine Institute of Volcanology and Seismology (DOST-PHIVOLCS) ang ika-97 nga Community Tsunami Alerting System (CTAS) sa nasod ngadto sa Baybay Boulevard, Borongan City.
Ang samang team gikan sa DOST-PHIVOLCS nipahigayon sa pag-instalar sa CTAS, diin ang Borongan City konektado na sa Philippine Tsunami Alerting Early Warning System (TEWS).
Matod ni Engr. Jaime Voces, City Disaster Risk Reduction and Management Officer sa LGU-Borongan, nga ang maong mga ekipo dako kaayo og tabang sa early warning capabilities sa naasoy nga dakbayan.
Gumikan mas mapalig-on pa niini ang pagpangandam sa tsunami alang sa pagpanalipod sa mga kinabuhi ug kabtangan, ilabi na sa 61 ka barangay sa dakbayan, diin 42 niini anaa sa mga coastal barangay.
Samtang, ang Information, Education, and Communication (IEC) Campaign and Workshop on Tsunami Evacuation and Integration of the 97th CTAS ngadto sa Tsunami Early Warning System (TEWS) sa Pilipinas gikatakdang ipahigayon sa umaabot nga mga adlaw.
