Giuli pagbalik ang tanang 15 ka mga sakyanan nga nahatag kaniadto sa mga buhatan sa Sangguniang Kabataan (SK) sa kagamhanan sa dakbayan sa Mandaue sayo adlawng Lunes Oktubre 13.
Matod ni City Administrator Atty. Gonzalo Malig-on, ang mga opisyal sa SK nagkasinabot nga bawion ang ordinansa nga naghatag sa mga sakyanan.
Sigon ni Malig-on nga si Mayor Thadeo Jovito “Jonkie” Ouano nihangyo kang SK Federation President Fleuritz Gayle Jumao-as nga iuli ang mga sakyanan aron magamit kini sa ubang mga departamento ug buhatan sa dakbayan nga nagkinahanglan og transportasyon.
Apan, ang SK Federation nihangyo—ug miuyon ang mayor—nga upat sa 15 ka mga sakyanan ipaubos sa kustodiya sa Mandaue City Youth Development Office (YDO). Kini nga mga sakyanan magamit sa 27 ka SK offices.
Gikatakdang makadawat ang mga buhatan sa 11 ka mga sakyanan nga gi-reallocate naglakip sa Mandaue City Environment and Natural Resources Office (MCENRO), Public Information Office (PIO), City Assessor’s Office, ug uban pang kritikal nga departamento nga nagkinahanglan og transport services.
Sa pikas bahin si Jumao-as miingon nga ang ilang desisyon nga ibalik ang mga sakyanan nagpakita sa kaandam sa SK Federation nga makigtambayayong sa kagamhanan sa dakbayan.
Kahinumdoman, niadtong Hunyo 9, giaprobahan sa Sangguniang Panlungsod ang ordinansa nga naghatag ug pagtugot sa kanhi Office of the Mayor sa pagpormal sa deeds of donation alang sa 15 ka mga sakyanan nga gihatag sa pinili nga SK chairpersons.
