Nakatala na og kapin sa 70 ang nadiskobrehan nga sinkhole sa mga dapit sa Northern Cebu nga grabeng naapektuhan sa 6.9 magnitude nga linog.
Kini ang gikumpirmar sa pangu sa Geosciences Division sa Mines and Geosciences Bureau Region 7 (MGB-7) nga si Josephine Aleta, diin 40 niini ang napalgan sa San Remigio, 16 sa Bogo City, ug 8 sa Daanbantayan.
Ingon man nga possible pa nga mosaka ang gidaghanon sa mga sinkhole formation ilabina human sa 5.8-magnitude nga aftershock nga natala niadtong Oktubre 13, diin ang epicenter niini nahimutang gihapon sa Bogo City.
Busa, giawhag ang publiko nga magpalayo, ug dili mosawom ingon man pag-inom sa tubig nga makita sa mga sinkhole nga mitumaw.
Sa pagkakaron, ang bureau nagpadayon sa paghimo sa geological ug hazard assessment sa mga lugar nga naapektuhan sa bag-ohay nga mga linog ug ila unang girekomendar ang mga local government units nga ibalhin ang mga residente nga nagpuyo ug duol sa maong mga sinkhole.
