PROVINCE OF CEBU- Gitangtang na sa listahan sa Philippine National Police (PNP) si Police Lieutenant Jephte Bariga human mapamatud-ang absent without leave (AWOL) ang maong opisyal nga giingong nanglugos sa 14-anyos nga batang babaye sa lungsod sa Ginatilan niadtong Septiyembre 28, 2025.
Kini ang gikumpirmar ni Police Colonel Abubakar Mangelen Jr., Provincial Director sa Cebu Police Provincial Office (CPPO), kinsa nagkanayon nga si Bariga karon nag-atubang sa kasong administratiba ug statutory rape.
Matud ni Col. Mangelen, dihang nasayran sa Police Regional Office–Central Visayas ang maong insidente, gitangtang dayon sa katungdanan si Bariga isip hepe sa Malabuyoc Police Station niadtong Septiyembre 30, subay sa direktiba ni Police Brigadier General Redrico Maranan, Regional Director sa PRO-7.
Sumala pa sa CPPO, gituohan nga nagpanago karon si Bariga sa kabukiran sa habagatang bahin sa Sugbo human kini dili na makita sa ilang operasyon.
Gipasabot usab ni Mangelen nga gilantaw karon sa ilang imbestigasyon ang posibilidad nga adunay usa ka pulis nga mitabang kang Bariga aron makalikay sa manhunt operation.
Gitataw sa opisyal nga dili na tugotan sa kapulisan nga madaot pa ang dungog sa institusyon tungod lamang sa lihok sa pipila ka tiwaling miyembro.
