Nailhan na sa sakop sa kapulisan ang nagpaluyo sa usa ka makalilisang nga krimen sa pagpatay kang Estela Ligaray, 44-anyos, biktima sa pagpanuok sulod sa simbahan sa San Fernando El Rey, Liloan, Cebu, kinsa pipila pa ka adlaw una nahibaw-an ang tinuod nga gigikan sa maong biktima.
Gikumpirmar ni Police Chief Master Sgt. Armi Goc-ong nga ang nalambigit sa maong insidente mao mismo ang bana ni Estela, ug nailhan sa pangalan nga si Ronnie Guinocor Ligaray, 40-anyos, ug taga-Brgy. Adela, lungsod sa Poro, Isla sa Camotes.
Apan, sa gikabutyag ni Police Chief Master Sgt. Arni Goc-ong, bisan pa nga nailhan na ang maong suspek sa pagpatay kang Estela, nagpabilin gihapon kining gawasnon sa iyang tulubagon sa balaod.
Atol sa esklusibong pakighinabi sa Bombo Radyo Cebu team kang Goc-ong, iyahang naasoy nga wala pa nadakpan si Ronnie , hinungdan nga naabot sila sa nagkalain-laing sama sa Tabuelan, Cebu, Lapu-Lapu City, ug Consoclasion, mga dapit nga adunay koneksyon ug napalgan ang mga parente sa maong suspek.
Dugang ni Goc-ong, nakompirmar nila ang ugat sa maong panghitabo ug nasayran ang identity sa mga personahe, tungod kay mismo ang anak sa biktima mao ang niingun nga iyahang mga ginikanan ang nalambigit niadto.
Dugang niya nga matod pa sa anak, nag-away na ang iyahang ginikanan sa dihang padung kini lakaw sayo sa buntag niadtong adlawa,ug giklaro usab nga si Ronnie, adunay problema usab sa iyahang panimuot sukad nga nadakpan kini niadtong buwan sa Agosto sa kasong Violence Against Women and Children (VAWC), hinungdan nga sukad atong hitaboa, magsige nalang og hinoktok nga susama wala sa kaugalingon.
Subay niini, matod ni Goc-ong, nagpabilin gihapon nga nag-awhag ang Liloan Municipal Police Station sa publiko nga kung ugaling
adunay makakita sa maong suspek, paduolon dayun sa ilahang buhatan aron madali na ang pagkasikop sa maong suspek.
