LILOAN,CEBU- Nasikop ang duha ka giilang high-value targets (HVTs) human makuhaag P2.55 milyones nga bakor sa gidudahang shabu sa usa ka buy-bust operation nga gipahigayon sa mga operatiba sa PDEA Regional Office 7 ug Liloan Municipal Police Station didto sa Purok Mahogany, Barangay Tayud, Liloan, Cebu, niadtong Mayo 31, 2026.
Giila ni PDEA 7 Regional Director Joel B. Plaza ang mga dinakpan nga silang alyas Joseph, 39 anyos, usa ka construction worker nga taga Barangay Catarman, Liloan, ug si alyas Christopher, 33 anyos, usa ka mekaniko nga lumad nga taga Barangay Tayud sa maong lungsod.
Nasakmit gikan sa mga suspetsado ang 13 ka pakete sa shabu nga motimbang og 375 gramos ug adunay danyos nga P2,550,000, lakip na ang buy-bust money, usa ka cellular phone, ug usa ka sedan nga sakyanan.
Gidala na ang mga nakompiskang ebidensya ngadto sa laboratoryo sa PDEA 7 Regional Office alang sa saktong disposisyon, samtang ang mga suspetsado temporaryo unang gitangong sa pasilidad sa PDEA 7 sa Lahug, Dakbayan sa Sugbo.
Mag-atubang ang mga dinakpan og mga kasong kalapasan sa Section 5 (Sale of Dangerous Drugs) dungan sa Section 26b (Conspiracy) ug Section 11 (Possession of Dangerous Drugs) ubos sa Artikulo II sa Republic Act 9165.
