Gipailawm sa Red ug Orange category ang 33 ka probinsya sa Luzon tungod sa halapad nga pag-igo sa Bagyong Uwan.
Kini gibase sa report sa Disaster Information Coordinating Center sa Department of the Interior and Local Government (DILG – CODIX) niadtong Nobyembre 8.
16 ka probinsya ang naa sa Alert Level Charlie o Red Alert nga mao ang Abra, Aurora, Benguet, Catanduanes, Ifugao, Ilocos Sur, Isabela, La Union, Mountain Province, Nueva Ecija, Nueva Vizcaya, Pangasinan, Quezon, Quirino, Tarlac, ug Zambales.
Ang nahisgutang mga probinsya anaa sa 180-kilometro nga diyametro sa maong bagyo. Gilauman nga makasinati sila og hangin nga moabot sa 130km/hr samtang naghulga ang bagyo.
Kusog hangtod sa grabeng pag-ulan ang naghulga usab sa nahisgutang mga probinsya.
Samtang, moabot sa 17 ka probinsya ang anaa sa Alert Level Bravo (Orange). Kini naa sa sulod sa 550-km nga diyametro sa maong bagyo.
Lakip niini ang Albay, Apayao, Bataan, Batanes, Bulacan, Cagayan, Camarines Norte, Camarines Sur, Cavite, Ilocos Norte, Kalinga, Laguna, Metro Manila, Northern Samar, Pampanga, Rizal, ug Sorsogon.
Makasinati kini sa hangin nga moabot sa 88 kph, inubanan sa kusog ngadto sa grabeng pag-ulan.
