Nangayo ang Department of the Interior and Local Government (DILG) og aksyon gikan sa Korte Suprema ug Kongreso aron palig-onon ang mga lakang batok sa mga insidente sa pagpamusil sa mga eskwelahan, nunot sa nahitabo sa Banga National High School sa South Cotabato.
Gitinguha ni DILG Secretary Jonvic Remulla nga hatagan sa Korte Suprema og pagtugot ang Philippine National Police (PNP) nga susihon ang mga panimalay sa mga kwalipikadong tag-iya og armas aron masiguro ang husto nga pagtipig niini.
Gibutyag sa Kalihim nga sa tulo ka insidente sa pagpamusil sa eskwelahan karong tuiga, gigamit ang mga rehistradong armas nga gipanag-iya sa mga kawani sa gobyerno; busa, ang mga tag-iya sa armas kinahanglang tulubagon direkta sa husto nga pagtipig sa ilang mga armas.
Kalabot niini, nakig-alayon ang DILG sa Department of Justice (DOJ) bahin sa petisyon nga iduso sa Korte Suprema, samtang nanawagan usab sa mga magbabalaod nga usbon ang kasamtangang mga balaod mahitungod sa pagpanag-iya og armas ug tulubagon niini.
Gawas sa isyu sa mga armas, tumong usab ni Remulla nga sulbaron ang impluwensya sa social media ug mga online community—sama sa mga “true crime” group—ngadto sa mga kabatan-onan, tungod kay mahimong makapadasig kini sa kapintasan.
Ang liderato sa DILG nakatakdang makigtagbo sa Department of Information and Communications Technology (DICT) ug mahimong mangayo og aksyon gikan sa Kongreso alang sa mas estrikto nga proteksyon sa mga bata online, lakip na ang paglimita sa access sa social media alang sa mga menor de edad.
