Nakadawat si Mayor Nestor Archival sa Dakbayan sa Sugbo og kinatibuk-ang P201,513 nga tabang pinansyal alang sa mga biktima sa Bagyong Tino atol sa culmination dinner ug awarding ceremony sa Taboada Balintawak World Camp 2025 nga gipahigayon sa Social Hall, Legislative Building, Cebu City Hall.
Gitunol ang tabang pinansyal atol sa kalihokan, diin nagtumong nga suportahan ang mga residente nga naapektuhan sa Bagyong Tino sa Dakbayan sa Sugbo, nga miigo niadtong Nobyembre 4, 2025.
Sa mensahe ni Mayor Archival, nipadayag kini sa iyang pasalamat kang Grand Master Bobby Taboada sa pag-organisar sa internasyonal nga kalihokan ug sa pagkamahinatagon sa grupo sa pagtabang sa mga biktima sa bagyo sa siyudad.
Busa, misaad si Archival sa iyang padayon nga suporta sa mga kalihokan sa Taboada Balintawak, ilabina kadtong makabenepisyo sa mga kabatan-onan, pamilya, ug sa pagpalambo sa turismo sa Dakbayan sa Sugbo.
Ang Taboada Balintawak World Camp 2025 adunay 150 ka foreign practitioners sa Filipino martial art gikan sa 10 ka mga nasud ug ang mga internasyonal nga bisita miabot sa Dakbayan sa Sugbo niadtong Nobyembre 1 ug milibot sa mga local attractions lakip ang Balintawak Street, Port San Pedro, Museum Sugbo, ug uban pang mga lugar niadtong Nobyembre 3, 2025.
Misuporta ang Department of Tourism (DOT) Central Visayas, kauban ang Cebu City Tourism Office sa kalihokan pinaagi sa Filipino Martial Arts Heritage Tourism Program, nga nakabenepisyo sa lokal nga mga akomodasyon ug mga tour operator. Mitambong usab sila si DOT Undersecretary Ferdinand Jumapao ug DOT-7 Officer-in-Charge Gelena Asis-Dimpas.
