Gipasakahan og mga kaso sa Philippine National Police (PNP) Criminal Investigation and Detection Group (CIDG) si Cavite Representative Kiko Barzaga.
Sumala ni CIDG Director Maj. Gen. Robert Alexander Morico II, ang mga
kasong sedition ug inciting to rebellion gisang-at sa opisina sa Quezon City prosecutors office tungod sa pagsugod sa “Trillion Peso March” niadtong Septyembre 21.
Wala na mohatag og dugang detalye si Morico tungod sa kahadlok nga makadaot sa imbestigasyon sa piskal.
Sa iyang post sa social media, si Barzaga nag-post og subpoena nga nagmando kaniya nga motambong sa opisina sa Quezon City Prosecutors office karung umaabot nga Nobyembre 17 ug 25 alang sa usa ka pasiunang imbestigasyon.
Kahinumduman nga si Barzaga nag-post sa makadaghang higayon sa iyang social media nga nag-akusar kang President Ferdinand Marcos Jr. sa korapsyon.
Siya usab ang nagpaluyo sa panawagan alang sa mga tawo nga magpahigayon og protesta atubangan sa Forbes Park sa Makati City diin nahimutang ang mga balay ni Leyte Rep. Martin Romualdez ug sa mi-resign nga si Rep. Zaldy Co.
