Gihagit ni Senate Minority Leader Alan Peter Cayetano si Health Secretary Teodoro Herbosa nga mo-resign kon makompleto niya ang cost analysis sa 160 ka ospital sulod sa usa ka semana.
Midawat si Herbosa sa maong hagit ni Cayetano.
Atol sa deliberasyon sa 2026 budget proposal sa DOH, gisuspinde ang mga lagda aron tugotan ang mga senador nga direkta nga makapangutana sa kalihim.
Gisaway ni Cayetano si Herbosa tungod sa karaan ug dili patas nga PhilHealth case rates, nga wala ma-update sulod sa pito ka tuig.
Tungod niini, matod niya, naglibog ang daghang pasyente sa ilang hospital billing bisan pa sa kanunay nga anunsyo sa DOH og “zero billing,” nga sa tinuod dili gayud zero kay daghan gihapon ang ilang bayranan.
Gipasabot ni Herbosa nga ang zero-billing policy para lamang sa mga indigent nga pasyente nga anaa sa basic o charity ward.
Natural lamang, ingon niya, nga kadtong naa sa pay o private wards kinahanglan gihapon mobayad bisan pa nga Misaka ang case rates sa pipila ka komon nga sakit.
Tungod sa kainit sa panagbangi tali ni Cayetano ug Herbosa, gisuspinde ang deliberasyon sa DOH budget ug ipadayun kini karong hapon.
