Gibalik ni kanhi Department of Public Works and Highways District Engineer Henry Alcantara ang kapin sa usa ka gatos ka milyon ka pesos nga kantidad sa kwarta ngadto sa Department of Justice gahpong adlawa.
Kung diin, sa usa ka video nga nakuha sa Bombo Radyo Philippines sulod sa departamento nagpakita sa dagkong kantidad sa kwarta nga personal nga gibalik uban sa abogado sa kanhi opisyal.
Sumala ni Justice Acting Sec. Fredderick Vida, ang kinatibuk-ang kantidad nga gibalik ni Alcantara ngadto sa departamento anaa sa 110 milyon ka pesos.
Gidugang niini, nga ang dagkong kantidad sa kwarta nga gibalik ni Alcantara gikan sa iyang gikawat o nakuha gikan sa anomalosong mga proyekto sa pagkontrol sa baha sa gobyerno.
Kini kabahin sa gitawag nga gisaad nga ‘restitution’ nga adunay kinatibuk-ang kantidad nga 300 milyon ka pesos sumala sa kalihim.
Gidugang sa kalihim nga kini nga lakang nga gihimo ni Alcantara, kinsa nalambigit sa iskandalo sa pagkontrol sa baha, usa sa mga kondisyon aron mapili isip ‘state witness’.
