Tugotan ang mga sundalo nga makauban ang ilang mga pamilya ug mga paryente karong kapaskuhan, sumala sa Philippine Army.
Gipasabot sa Tigpamaba sa Army nga si Colonel Louie Dema Ala nga bisan pa man nga ang Philippine Army magpabilin nga alerto sa tibuok kapaskuhan isip suporta sa Philippine National Police, siya miingon nga ang mga sundalo hatagan og higayon nga magsaulog sa Pasko uban sa ilang mga pamilya.
Usa sa mga sistema nga sundon sa Army mao ang pagbahin-bahin sa mga sundalo nga mag-duty atol sa Pasko samtang ang uban mag-duty atol sa Bag-ong Tuig.
Samtang kadtong dili mag-duty tugutan nga makabalik sa ilang mga probinsya sulod sa mubo nga panahon.
Subay niini, nangatarungan si Dema Ala nga ang mga sundalo kinahanglan usab nga makauban ang ilang mga pamilya ug mobati sa espiritu sa Pasko ug Bag-ong Tuig.
Gipasabot sa opisyal nga aduna gihapoy mga standby forces nga andam mosuporta sa bisan unsang mga panginahanglan o mga sitwasyon sa emerhensya.
Apil niini ang usa ka deployable response team kung adunay mga katalagman ug uban pang mga emerhensya sa nasud.
