Gibutyag sa Kagamhanang Lalawigan sa Sugbo ang pagsulbad niini sa problemang naka-istambay nga pasilidad nga gipanag-iya sa Kapitolyo nga pagahimuslan na ubos sa administrasyon ni Cebu Governor Pamela “Pam” Baricuatro.
Kini ang aksyon sa Kapitolyo human nasuta sa findings sa Commission on Audit (COA) sa 2024 Audit report niini nga adunay tulo ka mga pasilidad ang Kapitolyo nga walay gamit-gamit sulod na sa kapin lima hangtod sa pito ka tuig.
Gikatahong ang pagpatukod niining mga pasilidad kay muabot sa balor nga P50.4-milyones.
Sumala pa ni Cebu Provincial Administrator Atty. Ace Durano nga ang pagkig-alayon sa ubang ahensya sa gobyerno ang posibleng solusyon niini aron sa kaayuhan sa mga Sugbuanon.
Usa sa mga pasilibad nga gitumbok kay mao ang Cebu Provincial Skills Training Center sa dakbayan sa Naga nga karon ggamit sa Inayagan National High School human ang mga building sa tunghaan nadeklarang dili luwas nunot na sa nakalabayng mga linog ug bagyong miagi sa Sugbo.
Ang maong pasilidad nakumpleto niadtong 2018 sa balor nga P16.33-milyones diin natukod sa duha ka ektaryang luna nga gipanag-iya gihapon sa Kapitolyo.
Dugang pa na gi-aprobahan na sa gobernadora ang relokasyon human sa emergency nga gisugyot ni Naga City Mayor Val Chong.
Laing pasilidad kay ang Bahay Pag-asa nga didto gihapon sa dakbayan sa Naga diin natapos niadtong Oktubre 2020 sa balor nga P8.69-milyones. Asoy pa nga interesado ang mga ahensya sa Philippine Drug Enforcement Agency Region 7 (PDEA-7) ug Department of Social Welfare and Development (DSWD) sa pag-okupar sa maong pasilidad isip rehabilitation center for drug dependents o di ba kaha residential facility para sa mga Children in Conflict with the Law (CICL).
Ang ikatulong pasilidad kay mao ang Cebu Provincial Dormitory sa Cebu City kay natapos niadtong Disyembre 2019 sa balor nga P24.95-milyones diin gipanglantawan pud kini sa posibleng utilization sa maong edipisyo. Gimandoan na sa gobernadora ang Economic Enterprise Council sa pag-explore sa posibleng venture nga magamit niini ma-pampublikong sektor man o pribado kay walay mausik nga pasilidad ang Kapitolyo sa administrasyong Baricuatro.
