Arraignment sa kaso ni Sarah Discaya sa Cebu, gikatakda sa Enero

Gikatakda sa sunod tuig ang arraignment sa kontraktor nga si Sarah Discaya sa korte sa Cebu.

Sumala sa tigpamaba sa National Bureau of Investigation (NBI) nga si Palmer Mallari, ang arraignment ipahigayon sa Enero 13 sa alas 10 sa buntag sa Regional Trial Court Branch 27 sa Lapu-Lapu, Cebu tungod sa mga kasong graft ug malversation.

Si Discaya nag-atubang og mga kasong may kalabotan sa P96.5 milyon nga “ghost” flood control projects sa Davao Occidental.

Una niini, nasikop siya niadtong Disyembre 18 ug gidala sa Cebu paglabay sa usa ka adlaw.

Gawas kang Discaya, kauban niya ang iyang pag-umangkon nga si Ma. Roma Rimando ug walo pa ka tawo nga nalambigit sa maong anomaliya.