DEVELOPING STORY: Patay ang upat ka tawo human mahulog ang usa ka bus sa bangin sa Andaya Highway, Barangay Magais I, Del Gallego, Camarines Sur, mga alas 2 sa kaadlawon sa Biyernes, Disyembre 26, 2025.
Padayon pa ang imbestigasyon sa mga awtoridad kabahin sa maong insidente. Base sa inisyal nga imbestigasyon, gituohang self-accident ang hinungdan sa pagkahulog sa bus.
Ang bus gimaneho sa usa ka lalaki nga nailhan sa alyas nga “Jay,” hamtong, minyo, ug residente sa Cabuyao, Laguna. Ang drayber nakaangkon og grabeng mga samad ug gidala dayon sa ospital alang sa pagtambal.
Sumala pa sa imbestigasyon, gikan sa Cubao, Quezon City ang bus ug padulong sa Gubat, Sorsogon sa dihang gituohang nakatulog ang drayber, hinungdan nga nawad-an siya og kontrol sa manibela.
Tungod niini, napadulong ang bus sa tuo nga bahin sa dalan ug nahulog sa gibanabanang 10 metros ang giladmon nga bangin.
Kapin sa 20 ka pasahero ang nasamdan ug gidala dayon sa pinakaduol nga mga ospital alang sa dinaliang medikal nga tabang.
Dali nga niresponde ang kapulisan kauban ang Bureau of Fire Protection (BFP), MDRRMO Del Gallego, ug Tagkawayan Rescue and Traffic Management alang sa rescue operations ug imbestigasyon.
