Gi-turnover sa Philippine Charity Sweepstakes Office (PCSO) ang mga importanteng kagamitan medikal ngadto sa upat ka pampublikong ospital sa Cebu atol sa usa ka seremonya sa donasyon sa Cebu Provincial Hospital – Balamban karong adlawa sa Huwebes, Enero 15, 2026.
Ang turnover ceremony gipangulohan ni Presidente Ferdinand “Bongbong” Marcos Jr., uban ni PCSO General Manager Melquiades A. Robles, nga nagpasiugda sa pasalig sa nasudnong gobyerno sa pagpalambo sa access sa dekalidad nga pag-atiman sa panglawas, ilabina sa mga probinsya.
Kini nga donasyon, naglakip sa mga ultrasound machine ug X-ray machine nga gituyo aron mapalig-on ang serbisyo sa diagnostic sa mga pampublikong ospital.
Ang matag usa sa upat ka benepisyaryo nga ospital makadawat og usa ka ultrasound machine ug usa ka X-ray machine, nga magtugot sa mga health worker sa pagpahigayon og mas paspas ug mas tukma nga medikal nga eksaminasyon.
Ang mga ospital nga makabenepisyo mao ang:
Cebu Provincial Hospital – Bogo City
Cebu Provincial Hospital – Danao City
Cebu Provincial Hospital – Balamban
Daanbantayan District Hospital, sa Munisipyo sa Daanbantayan
Sa pakighinabi sa Bombo Newsteam, gipaambit ni Dr. Olivia A. Dandan, Chief of Hospital sa Cebu Provincial Hospital – Balamban, ang ilang kalipay ug pagpasalamat tungod kay kini ang una nga higayon nga mibisita ang usa ka Presidente sa nasud sa maong ospital.
Gidugang pa niya nga uban sa dugang nga kagamitan, gilauman nga ang mga doktor ug mga kawani sa medisina makahimo sa sayo ug tukma nga pagdayagnos sa mga sakit, ug makahatag og husto nga pagtambal sa mga pasyente, ilabi na sa mga komunidad nga kulang sa serbisyo medikal.
