Gidakop sa mga sakop sa Police Station 6 sa Cebu City Police Office (CCPO) ang usa ka 30-anyos nga construction worker human kini pasanginli nga niamong-among sa usa ka 7-anyos nga batang babaye didto sa Tres de Abril Street, Barangay Pahina San Nicolas Proper, ning dakbayan, niadtong Lunes sa kaadlawon, Enero 19, 2026.
Giila ang suspek nga si Belino Landero, ulitawo ug lumad nga taga-Barangay Cabungahan, Dakbayan sa Danao, samtang ang biktima nga si alyas “Sahaya” residente sa Taboan Public Market.
Sumala ni PltCol. Jose Losbaños, ang tigpamaba sa Cebu City Police Office, atoll sa ekslusibong pakighinabi usab sa Bombo Radyo Cebu Newsteam kaniya, nahitabo ang krimen tali sa alas 2:00 hangtod alas 3:00 sa kaadlawon, apan na-report na kini sa buhatan sa kapulisan pasado alas 6:30 na sa buntag.
Sa gihimong imbestigasyon, gisaysay sa biktima nga gidala siya sa suspek sa usa ka mangitngit ug bakanteng lote diin gihubuan siya niini ug gihikap ang iyang pribadong parte sa lawas.
Dugang gikabutyag ni Losbaños nga human mahibalo ang mga ginikanan sa biktima, daling nangayo og tabang ang pamilya ngadto sa kapulisan nga miresulta sa pagkasikop ni Landero.
Sa pagkakaron, ang suspek detinado na sa Police Station 6 ug mag-atubang og kasong kalapasan sa Section 5 (b) sa Republic Act 7610 o ang Special Protection of Children Against Abuse, Exploitation and Discrimination Act.
