Giangkon ni Environment Secretary Raphael Lotilla niadtong Lunes nga ang makamatay nga pagdahili sa basura sa Binaliw landfill sa Sugbo niadtong Enero 8 nagsilbing “eye-opener” alang sa Department of Environment and Natural Resources (DENR), hinungdan sa pagmando og nationwide review sa seguridad sa tanang landfill.
Sa usa ka media briefing alang sa ika-25 nga anibersaryo sa Republic Act No. 9003 o ang Ecological Solid Waste Management Act sa Quezon City niadtong Martes, gipahayag ni Lotilla nga gitinguha sa ahensya ang tulubagon sa maong insidente. Matud pa niya, usa kini ka trahedya nga kinahanglang kakuhaan og leksyon, ilabi na nga 36 ka kinabuhi ang nawala ug dili mahimo nga pasagdan lang kini nga walay lihok nga pagahimoon.
Gikumpirma usab ni Lotilla ang pag-ilis sa mga pamunoan sa DENR Region 7 (Central Visayas) aron masiguro nga dili na masubli ang trahedya sa Binaliw nga nikalas og 36 ka tawo ug niasol og 18 ka samaran. Aduna nay bag-ong Regional Executive Director ug bag-ong Environmental Management Bureau (EMB) director sa Rehiyon 7 nga gitahasan sa pagpalig-on sa operasyon sa maong dapit.
Tungod sa maong hitabo, nimando si Lotilla og dinalian nga inspeksyon sa tanang sanitary landfill sa tibuok nasod. Gidirekta niya ang tanang regional offices nga hugot nga ipatuman ang environmental compliance certificates (ECCs) ug mga safety protocols aron sayo nga mailhan ang mga peligro ug mapatuman ang mga corrective measures sa dili pa mahitabo ang mga aksidente.
Giklaro hinuon sa kalihim nga ang pag-usab sa liderato sa Central Visayas dili pa mao ang katapusang konklusyon sa accountability, sanglit nagpadayon pa ang pormal nga imbestigasyon sa usa ka multi-sectoral committee. Gipasiugdahan usab niya nga ang problema sa basura dili lang responsibilidad sa gobyerno, kundi nagdepende usab sa saktong pagdumala sa basura sa matag panimalay ug indibidwal.
Base sa datos sa DENR niadtong Septyembre 2025, adunay 373 ka operational sanitary landfills sa tibuok nasod nga nagserbisyo sa 709 ka mga LGU.
