Gipanghimakak sa Department of Environment and Natural Resources (DENR) ang mga pasangil nga migamit kini og pesticide gas batok sa mga nagprotesta human nagpahigayon sila og rally atubangan sa ilang opisina sa Quezon City.
Sumala sa ahensya, ang gabon nga nakita sa maong lugar gikan sa ilang regular nga defogging activity matag Domingo ug wala kini gigamit aron pagpatibulaag sa mga nagprotesta.
Gipasabot sa DENR nga ang maong kalihokan kabahin lamang sa ilang pagsunod sa mga sumbanan sa kalimpyo ug kahinlo sa trabahoan, ug wala sila mogamit og bisan unsang kemikal alang sa pagkontrol sa panon sa katawhan.
Una niini, pipila ka progresibong grupo gikan sa Southern Tagalog ang nag-akusar sa DENR sa giingong pagpagawas og pesticide samtang nagpahigayon sila og protesta sa Visayas Avenue niadtong Hulyo 26.
Ang maong protesta kabahin sa ilang caravan padulong sa Metro Manila isip pagpahayag sa ilang mga panawagan sa wala pa ang State of the Nation Address (SONA) ni Presidente Ferdinand “Bongbong” Marcos Jr.
Gisupak sa mga grupo ang pipila ka proyekto ug polisiya sa gobyerno nga ilang giingong makadaot sa kalikopan, ilabina sa mga kabukiran, ug mahimong hinungdan sa pagbalhin sa pipila ka komunidad.
Gikondenar usab nila ang ilang gitawag nga “peke nga kalamboan,” nga ilang giingong mas nakabenepisyo sa dagkong negosyo ug langyaw nga interes kaysa sa mga komunidad nga apektado.
Bisan pa sa ilang reklamo bahin sa gabon, gipadayon sa mga nagprotesta ang ilang programa, lakip na ang pagpaupaw isip simbolo sa ilang pagsukol batok sa pagkaguba sa kabukiran.
