Niduso og panawagan ang duha ka magbabalaod alang sa usa ka Congressional inquiry kalabot sa pagkalunod sa usa ka barko sa kadagatan sa Basilan niining semanaha, diin dili moubos sa 18 ka tawo ang nakalas ug 10 pa ang missing.
Ang MV Trisha Kerstin 3 nga gipanag-iya sa Aleson Shipping Lines adunay sakay nga sobra sa 344 ka pasahero sa dihang naunlod kini sayo sa buntag niadtong Lunes. Tungod niini, giawhag nila ni Kusug Tausug Party List Representative Aiman Tan ug Basilan Representative Ustadz Yusop Alano ang ubos nga balay-balauran nga mopahigayon og “full and independent investigation” aron masuta ang tinuod nga hinungdan sa trahedya ug ang posibleng pagpasagad sa mga hingtungdang ahensya sa gobyerno.
Gipasiugdahan ni Tan nga ang maong trahedya dili lang basta numero sa estadistika kondili usa ka dako nga kawalan nga nagkinahanglan og tulubagon ug dinalian nga aksyon. Samtang si Alano nipadayag usab nga kini nga insidente dili usa ka hilit nga kaso, sanglit tulo na ka dagkong aksidente ang nahitabo sulod lang sa usa ka dekada sa mao gihapong kompanya sa barko, butang nga nagpakita og dakong buslot sa sistema sa seguridad sa dagat.
Dugang pa ni Alano, gawas sa imbestigasyon, kinahanglan usab ang dinalian ug komprehensibong safety audit sa tanang mga barko sa maong shipping line. Nanawagan ang mga solon nga dili himuong babag ang gilay-on sa lugar o ang kahimtang sa kinabuhi sa mga biktima aron malangan ang pagpangita og hustisya ug pagpatuman og saktong reporma sa transportasyon sa dagat.
