MANDAUE CITY- Pormal nga gipasakaan og kaso sa Office of the Ombudsman ang kanhi gitangtang nga cash clerk sa Mandaue City Treasurer’s Office tungod sa giingong pagwaldas sa ₱3 milyon nga pundo sa siyudad.
Girepresentahan ni City Administrator Atty. Gonzalo “Sally” Malig-on Jr. ug uban pang mga opisyal sa siyudad, nagsang-at og kasong kriminal tungod sa malversation of public funds batok kang Mary Leah Quimbo, usa ka Administrative Aide IV.
Sigon Atty. Malig-on nga si Quimbo gitangtang sa serbisyo sa gobyerno niadtong Oktubre sa miaging tuig human sa imbestigasyon nga gihimo sa City Legal Office.
Gawas kang Quimbo, duha ka job order employees ang nalambigit usab sa giingong pagkunsabo sa kaso.
Gitangtang usab sila sa serbisyo ug gilauman nga mag-atubang og managlahing kasong kriminal.
Dugang niya nga ang kagamhanan sa dakbayan nagpatuman na og dugang nga mga panalipod ug bag-ong mga pamaagi aron mapugngan ang wala gitugot nga pagkuha o pag-abuso sa pundo sa siyudad.
