Zelensky, gidapit si Putin nga magkita sila sa Kyiv alang sa usa ka meeting

Gidapit ni Presidente Volodymyr Zelenskyy sa Ukraine si Presidente Vladimir Putin sa Russia nga makigkita siya niini sa Kyiv kung gusto gyud niya.

Gitino sa Ukraine President, nga andam na siya alang sa bisan unsang klase sa meeting apan dili moadto sa Russia o Belarus sama sa imbitasyon sa Kremlin.

Dugang niya nga imposible alang kaniya nga moadto sa Russia alang sa usa ka meeting sama sa pag-adto ni Putin sa Kyiv busa gihagit niya kini nga moadto usab sa Ukraine.

Giinsistir niya nga ang Russia nanguna sa pagpakiggubat, diin kakunsabo niini ang Belarus.

Sa miaging semana, ang duha ka nasud nagpahigayon og mga panagsulti sa Abu Dhabi samtang ang ikaduhang panagsulti sa kalinaw o peace talks nga gipangulohan sa US gikatakda sa Domingo.