Mokabat sa P708.1 milyones ang balor sa plano sa lokal nga kagamhanan sa probinsya sa Sugbo, alang sa tulo ka tuig nga rehabilitasyon ug pagpabangon sa mga dapit nga gitay-og sa linog sa Northern Cebu niadtong Septiyembre 30, 2025.
Kini nga plano gipresentar atol sa tigom sa Provincial Disaster Risk Reduction and Management Council (PDRRMC), ug gipangulohan kini ni Cebu Governor Pamela “Pam” Baricuatro kauban ang department heads sa Kapitolyo, mga mayor, ug mga opisyal sa nagkalain-laing rehiyonal nga mga buhatan sa gobyerno.
Apil sa mga mayor nga nitambong sila si Bogo City Mayor Maria Cielo “Mayel” Martinez, Borbon Mayor Nico Dotillos, Daanbantayan Mayor Gilbert Arrabis, Jr., ug San Remigio Mayor Mariano Martinez.
Tuyo sa tigom ang paglinya sa mga prayoridad alang sa rehabilitasyon ug ang funding strategies, diin sa P708.1 milyones nga alokasyon, P311 milyones alang sa sector sa agrikultura ug fisheries, P254.1 milyones alang sa pagpaayo sa 13 ka mga taytayan nga nangaguba, ug P143 milyones sa pagpabuhi sa turismo.
Sumala ni Provincial Disaster Risk Reduction and Management Office (PDRRMO) Head Dennis Francis Pastor ang recovery roadmap sa Kapitolyo pinasubay sa “Build Back Better and Smarter” framework.
Gidesinyo kini dili lang alang sa dinalian nga relief ug pagpaayo kondili sa pagpalig-on usab sa long-term resilience batok sa moabot nga mga kalamidad.
