Gikumpirma sa Department of Justice nga ang 5 ka reklamo nga gisang-at sa Bureau of Internal Revenue batok sa magtiayong Curlee ug Sarah Discaya hingpit nang nasulbad.
Kini ang gipaambit ni Atty. Polo Martinez, tigpamaba sa nahisgutang departamento, sa dihang gipangutana bahin sa mga reklamo nga giatubang sa magtiayon.
Miingon siya nga duha niini ang gikatakdang ipasaka sa Court of Tax Appeals batok sa mga Discaya human matino sa prosekusyon ang reklamo.
Diin base sa resolusyon niini, adunay ‘prima facie of evidence with certainty of conviction’ o lig-on nga ebidensya nga makapamatuod sa alegasyon.
Ilabi na, sila pasakaan og kaso sa paglapas sa Section 154 ug 155 sa National Internal Revenue Code.
Tungod niini, daw napakyas ang mga Discaya sa pagpaambit sa tinuod ug saktong impormasyon sa ilang ‘Income Tax Returns’.
Dugang niya nga ang magtiayong Discaya giingong nagtago sa ilang tinuod nga kita sa ilang ‘Income Tax Returns’ para sa Taxable Year 2020 ug 2021.
Matod niya nga kini nadiskobrehan sa ‘panel of prosecutors’ diin nakita nga ang magtiayon wala magbahin sa tinuod nga kantidad sa ilang kita.
Samtang, bahin niini, gikumpirma usab ni Justice Spokesperson Martinez nga gibasura sa prosekusyon ang 3 ka kaso sa excise tax batok sa mga Discaya.
Matod niya nga ang pagbasura tungod sa pagtino sa prosekusyon nga ang magtiayon dili usa ka ‘importer’.
Matod niya nga ubos sa balaod, dili sila manubag tungod kay ang ‘excise tax’ responsibilidad sa importer.
“Nakita sa panel nga sila si Sarah ug Curlee dili mga importer, busa dili sila manubag sa wala pagbayad sa excise tax. Ang manubag sa pagbayad sa excise tax mao ang aktuwal nga nag-import. Kinsa ang nagpalit sa mga sakyanan,” matod ni DOJ Spokesperson Atty. Polo Martinez.
Busa, matod niya, gi-abswelto sila sa mga piho nga reklamo nga may kalabotan sa pagpanag-iya sa mga luxury car.
