Nasagmuyo ug nadismaya ang pipila ka overseas Filipino workers (OFWs) ug mga supporters ni Rodrigo Duterte human sa balita nga dili motambong ang kanhi presidente sa confirmation of charges hearing nga gi-iskedyul sa International Criminal Court sugod Pebrero 23 hangtod 27, 2026 sa The Hague.
Ang desisyon nga dili motambong gihimo pinaagi sa usa ka sinulat nga waiver nga gisumite sa kampo ni Duterte, ug gihatagan og pagtugot sa ICC Pre-Trial Chamber I nga ipadayon ang mga sesyon bisan wala siya personal nga motungha sa korte.
Sumala kang Angel Axinto, Bombo News correspondent sa Netherlands, “frustrated” ang gibati sa daghang mga supporters nga anaa sa lugar, ilabina kadtong dugay nang nagsubay sa legal nga proseso ug nagpaabot nga makita unta ang kanhi presidente sa personal.
Bisan pa niini, gipahayag sa mga tagasuporta nga magpadayon gihapon ang ilang suporta kang Duterte, bisan wala ang iyang personal nga presensya sa hearing.
Gani, nagpadayon ang mga panagtapok sa mga Pilipino sa lugar matag semana aron ipakita ang ilang suporta.
Aktibo usab ang kampanya sa social media pinaagi sa pagpakaylap sa mga video ug mensahe nga giila sa mga tagasuporta nga makapadasig ug makapalig-on sa ilang paglaum.
Nagtuo ang kadaghanan sa mga supporters nga dili mawala ang ilang pagsalig sa kanhi lider ug naglaum nga sa umaabot, makabalik pa siya sa Pilipinas bisan pa sa mga kasong iyang giatubang.
