Gipamatud-an ni Punong Ministro Benjamin Netanyahu sa Israel nga malampusong nalusad ang “Operation Roaring Lion,” usa ka hiniusang operasyon uban sa Amerika nga niresulta sa pagka-neutralize ni Ayatollah Khamenei ug sa uban pang dagkong opisyal sa Iran.
Sa gihimong sorpresang pag-atake didto sa Tehran, naguba ang compound sa Supreme Leader lakip na ang mga kuta sa mga matataas nga komander sa Islamic Revolutionary Guard Corps (IRGC) ug ang mga utok luyo sa nuclear program sa nasud.
Sumala ni Netanyahu, daghan na ang mga senyales nga ang diktador “wala na” ug kini usa ka mahinungdanong lakang aron hingpit nga mapakgang ang hulga sa nukleyar gikan sa rehimeng Ayatollah.
Nagpaabot usab og dako nga pasalamat si Netanyahu ngadto kang Presidente Donald Trump tungod sa lig-on nga alyansa ug suporta sa Amerika niining maong makasaysayanong misyon. Gipasiugdahan niya nga ang alyansa sa duha ka nasud anaa sa kinatas-ang ang-ang o “all-time high” karon nga panahon sa gubat ug kalinaw.
Gitawag niya si Trump nga usa ka lider nga tumutupad sa saad, ug ang maong pagtinabangay maoy yawe sa gitawag niya nga “War of Redemption” nga nagtumong sa pagdala og tinuod nga kalinaw sa tibuok Middle East.
Nanawagan karon ang Prime Minister sa mga katawhang Iranian—lakip na ang mga Persians, Kurds, ug Azeris—nga dili usikan ang maong kahigayonan ug mobarog aron mapukan ang rehimen nga naghatag kanila og kalisod.
Gipakasama niya ang kaisog sa Israel sa estatwa sa “Roaring Lion” sa Tel Hai isip paghandom sa kaisog ni Joseph Trumpeldor. Pinaagi niini, naglaum ang Israel nga ang pagkagun-ob sa gahum sa Tehran mahimong dalan alang sa kagawasan sa mga lungsuranon sa Iran gikan sa mapihigong pagmando.
