Misangpot sa usa ka panag-away ug mitumaw nga tensyon tali sa mga raliyista ug sa mga sakop sa kapulisan ang gipahigayon nga kilos protesta ug demonstrasyon gahapong adlawa dungan sa pagsaulog sa Women’s Month.
Ang maong programa gipangulohan sa Gabriela, Kabataan ug uban pang mga militanteng grupo.
Basi sa inisyal nga impormasyon, ang tensyon nagsugod human ang mga demonstrador misulay sa pagmartsa gikan sa Liwasang Bonifacio paingon sa atubangan sa US Embassy, nga diha-diha dayon gibabagan sa kapulisan.
Giingong dinhi nagsugod ang pipila ka mga miyembro sa mga militanteng grupo sa pagsinggit, pagduso ug pagbinanggaay.
Bisan pa niini, ang pulis nga gipangulohan sa Manila Police District (MPD) nagpabilin gihapon sa taas nga lebel sa pagpugong aron malikayan ang dugang nga pag-usbaw sa tensyon tali sa duha ka habig.
Sa katapusan, ang mga raliyista ug pulis miuyon nga magmartsa lang sa Kalaw Ave. aron ipadayon ug tapuson ang ilang programa tungod kay ang mga ordinansa klaro nga nag-ingon nga ang lugar sa US Embassy dili bahin sa mga freedom parks.
Samtang, nanawagan ang grupo kon giunsa pag-apekto sa pagsaka sa presyo sa mga palaliton tungod sa nagpadayon nga armadong panagbangi sa Middle East ang katawhang Pilipino, labi na ang mga inahan ug mga trabahante.
Apil usab sa mga panawagan ang pagduso sa pagpasar sa balaodnon nga nagtumong sa pagwagtang sa Value-Added Tax (VAT) sa mga importanteng palaliton ug bisan sa pipila ka mga serbisyo, ingon man ang pagpahamtang og buhis sa mga produktong petrolyo.
