NAGA CITY, CEBU- Nag-isyu og show cause order ang Land Transportation Franchising and Regulatory Board o LTFRB batok sa operator sa usa ka public utility jeepney nga nalambigit sa road crash incident sa Cebu gahapon Lunes, March 9.
Sumala kang LTFRB Chairperson Atty. Vigor D. Mendoza II, gihimo kini aron matuki ug mapatin-aw ang tinuod nga nahitabo sa aksidente ug masuta kon adunay kakulang o lapses sa bahin sa pampasaherong jeep.
Giingon ni Mendoza nga gusto sa ahensya nga masayran ang tanang detalye sa insidente dili lamang aron matino kon kinsa ang adunay responsibilidad, kundi aron usab makapahimo og mga polisiya nga makapalig-on sa road safety ug makalikay sa susamang aksidente sa umaabot.
Padayon pa karon ang imbestigasyon sa LTFRB may kalabotan sa maong insidente.
Kahinumduman, nga mokabat sa 16 ka mga indibidwal ang nasamdan human mabanggaan sa usa ka sedan ang maong jeep samtang nagpasakay kini og mga pasahero sa daplin sa dalan sa Barangay Tuyan, City of Naga.
