Gihaya karon sa kapilya sa Zone Talong, Barangay Paknaan, dakbayan sa Mandaue ang 31-anyos nga inahan nga si Mary Christ Cuizon human sa usa ka makasubo nga hitabo.
Niadtong Miyerkules, Marso 11, didto si Cuizon sa Barangay Opao gym alang sa validation sa iyang P5,000 nga cash assistance, diin kwalipikado siya isip biktima sa Bagyong Tino nga niigo sa Sugbo niadtong Nobyembre 4 sa milabayng tuig.
Bisan kon nalista na siya isip benepisyaryo, ang iyang payout gitakda pa unta karong sunod semana, Lunes, Marso 23.
Sumala sa iyang amahan nga si Jennifer Cuizon, sa ilang pamilya, ang biktima ra ang bugtong nalista alang sa maong “ayuda,” mao nga naningkamot kini sa pag-adto aron maproseso ang maong hinabang.
Gidugang usab sa amahan nga mamatikdan nga huyang pa ang lawas ni Mary Christ tungod kay unom pa lang ka bulan ang nilabay sukad kini nanganak.
Apan, sa wala pa kini mogawas sa ilahang balay, nipasalig ang iyang anak kanila nga maayo ra ang iyang pamati ug kahimtang.
Giasoy usab niini nga basi sa mga saksi ug mga video sa social media, nilungtad pa og hapit 30 minutos una nahatagan og medical attention ang iyang anak sa wala pa kini nadala sa Mandaue City Hospital.
Subay niini, nanawagan si Jennifer Cuizon sa City Government ug sa barangay nga susihon pag-usab ang CCTV footage aron mahibal-an kung kinsa ang posibleng nagpabaya sa pag-atiman sa iyang anak nga babaye.
