Moluwat og subpoena ang House Committee on Justice sa income tax returns ni Vice President Sara Duterte ug sa iyang bana nga si Manases “Mans” Carpio ug value-added tax (VAT) returns sa tanang negosyo nga nalista sa State of Assets, Liabilities and Net Worth (SALN) sa Bise Presidente gikan sa 2023 hangtod 2024, sumala ni Bicol Saro Party-list Rep. Terry Ridon.
Matod niya nga kini dugang pa sa pag-subpoena sa mga SALN ug mga transaksyon sa bangko sa magtiayon.
Sumala ni Ridon, base sa gisumite sa Bise Presidente nga 2024 SALN, siya adunay net worth nga P88 milyon apan ang natipon nga sweldo sa Bise Presidente gikan sa 2007 hangtod 2024 mokabat lamang sa P30 milyon hangtod P40 milyon.
Giinsistir ni Ridon nga kinahanglan ipasabut sa Bise Presidente ang kwestyonableng kal-ang, nga mahimong maklaro pinaagi sa gitawag nga “other lawful income” gikan sa law practice ug mga interes sa negosyo nga nalista sa SALN sa Bise Presidente.
Gipasiugda sa magbabalaod nga ang proseso sa impeachment kinahanglan nga susihon ang kita sulod sa 17 ka tuig nga panahon nga P200 milyon ngadto sa P400 milyon aron madiskobrehan ang P50 milyon nga kalainan tali sa natipon nga sweldo ni VP Sara gikan sa 2007 hangtod 2024 ug sa iyang net worth sa 2024.
Una, giawhag ni Rep. Chel Diokno ang Justice committee pinaagi sa iyang sulat nga mag-isyu og “subpoena duces tecum” para sa daghang mga dokumento, lakip na kadtong magbutyag sa mga interes sa negosyo ni VP Sara ug Atty. Mans Carpio.
Ang gipangayo nga mga dokumento naglakip sa mga sertipikasyon gikan sa Anti-Money Laundering Council (AMLC) bahin sa mga kadudahang transaksyon nga konektado sa mga account ubos sa mga ngalan ni VP Sara, Manases Carpio ug kanhi Presidente Rodrigo Duterte.
Sumala sa Justice Committee, mahimo nilang i-subpoena ang mga rekord sa bangko gikan sa 2007 hangtod karon aron masusi ang wala matino nga bahandi ug imbestigahan ang mga alegasyon sa korapsyon.
