Namatay ang usa ka 36-anyos nga delivery rider human nadamay sa giingong lumba sa motorsiklo kaganihang alas 3:37 sa kadlawon, Marso 23, sa dalan Gorordo Avenue, Barangay Lahug, dakbayan sa Sugbo.
Giila ang biktima nga si Ivan Serentas Avila, residente sa Visitacion Street, kinsa padulong na unta mosugod sa iyang trabaho sa dihang kalit lang kining nadasmagan.
Base sa nakuha nga CCTV footage gikan sa Barangay Lahug Command Center, nakita ang tibuok hitabo diin nalambigit ang duha ka motorsiklo nga nagkarera sa dalan.
Gisubay na sa mga awtoridad ang drayber sa usa sa mga motorsiklo nga daling nailhan nga usa ka 19-anyos nga lalaki nga walay lisensya.
Samdan usab ang maong drayber lakip na ang iyang angkas nga usa ka menor de edad gumikan sa kakusog sa impact sa pagpamangga.
Nipakita sa dugang pakisusi nga duna pay laing lalaki nga drayber ang nibalik ug nadasmag pa gayod sa biktima, nga gituohang maoy hinungdan sa grabeng kadaot sa ulo ni Avila nga miresulta sa iyang hinanaling kamatayon.
Nakita usab sa CCTV ang moabot sa unom ka mga motorsiklo nga giingong mga kauban sa nakabangga nga nibalik pa sa dapit aron susihon ang ilang mga kauban nga nangatumba.
Nagpadayon pa ang gihimong imbestigasyon sa kapulisan aron hingpit nga mailhan ang tanang nalambigit sa maong insidente ug aron mapasaka ang tukmang kaso batok sa mga responsable sa kamatayon sa inosenteng rider.
