Laoman nga ugmang adlawa, Marso 24, 2026, mas mo-umento pa ang presyo sa produktong petrolyo, diin mosulbong na usab ang laing fuel price hike subay sa nagpadayong panagbangi ug tensyon sa Middle East.
Diin, gibanabana nga ang mosunod mao ang usbaw matag litro:
-Diesel: P16.50 hangtod P17.50 matag litro
-Gasolina: P7.50 hangtod P8.50 matag litro
Matod pa sa Department of Energy (DOE), makapasalig sila nga igo ang suplay sa lana sa nasod, bisan pa sa aspas nga pagsaka sa presyo, apan nagpahimangno sila batok sa pag-hoard o pagtago sa suplay.
Samtang gikabutyag ni Energy Secretary Sharon Garin, unpredictable ang paghoard.
Kung mag-hoard ang usa, maapektuhan ang iba, especially ang PUVs, ug dugang niya, kinahanglan nga kapugngan ang pag-hoard aron dili makamugna og dugang kalisang sa katawhan.
Subay niini, esksklusibong nahinabi sa Bombo Radyo Cebu si Rody Dacoylo, 60 anyos nga taxi driver, taga Lungsod sa Aloguinsan, Cebu.
Matod pa ni Dacoylo, ang padayun pa sa pagtaas sa presyo sa diesel ning kasamtangan hilabi na ugmang adlawa nga Mega Oil Price Hike na usab, naghatag kaniya og tumang kabalaka isip usa ka drayber.
Iyang gipaambit nga nanghinaot siya nga matabangan sa gobyerno ang mga drayber sa kasamtangang sitwasyon gumikan kay karong panahona, walay drayver nga wala maglisud tungod kay dili lang presyo sa produktong petrolyo ang padayong nagsaka, apan lakip na usab ang mga nag una ug batakang palaliton.
Sama nalang sa iyang kasinatian nga ang napalit niya nga bugas nagkantidad na og P72 ang kilom, diin matod niya, dugang kalisud kay ang ilang pangita, sakto ra pangbayad sa gasolina.
