CEBU CITY– Gipusil sa usa ka security guard ang duha ka mga lalaki nga nagtambay sa daplin sa dalan sa V. Rama Avenue, Sitio San Antonio, Barangay Calamba, Dakbayan sa Sugbo, pasado alas 9 sa buntag gahapong adlawa, Marso 27, 2026.
Gideklarang patay sa tambalanan ang biktimang si Vicente Gemuta, 39-anyos, samtang pipila ka oras ang milabay, nakabsan usab sa kinabuhi si Renato “Atoy” Belanizo, 52-anyos, nga pulos residente sa maong lugar.
Giila ang suspek nga si Joel Rentuma, 47-anyos, usa ka security guard ug lumulupyo sa Barangay Punta Princesa.
Base sa inisyal nga imbestigasyon sa Sawang Calero Police Station, nag-ugat ang krimen human magduda ang suspek nga gibully siya sa mga biktima samtang aduna kini’y gipalit sa usa ka tindahan.
Matod sa anak sa suspek, kinsa nihangyo nga dili magpaila, nailang “putong,” hilomon, ug daling masuko ang iyang amahan.
Subay niini, gipadangat ni Jovelyn Gemuta, igsuon sa usa sa mga biktima, ang iyang dakong kaguol ug katingala sa maong duguong insidente.
Hugot nga gisalikway ni Jovelyn ang pasangil nga “bullying” ang motibo sa suspek tungod kay nailang buotan ug malinawon ang iyang igsuon nga dugay na nga drayber sa 06-A nga rota.
“Lisud kaayo iyang rason nga mo-ingon siya nga gi-bully siya,” matod pa ni Jovelyn kinsa nipasabot nga kapin na sa 20 ka tuig silang nagpuyo sa maong lugar apan wala gayod malambigit sa bisan unsang gubot ang iyang igsuon.
Sa pagkakaron, anaa na sa kustodiya sa kapulisan ang suspek samtang nakig-alayon na si Jovelyn sa mga awtoridad aron ipaubos sa drug test ang gwardiya pagsuta kon naggamitan ba kini og ginadiling drugas atol sa pagpamusil.
