Pipila ka mga group sector ang nagsang-at og mga reklamo sa Office of the Ombudsman Lunes, Marso 30, 2026 batok sa pipila ka kanhi mga opisyal nga nalambigit sa isyu sa mga anomalosong proyekto sa flood control projects.
Lakip sa mipasaka og reklamo ang Kilusang Bayan Kontra Kurakot, Bagong Alyansang Makabayan ug uban pa, partikular nilang gireklamo ang kanhi Undersecretary nga si Adrian Bersamin, ug ang kanhi Department of Education Usec.Trygve Olaivar.
Sumala ni David San Juan sa Kilusang Bayan Kontra Kurakot, nga ila kining gipasaka sa Ombudsman aron sila manubag.
Diin ilang giawhag ang Ombudsman nga imbestigahan ang posibleng mga paglapas sa ‘Code of Ethics of Public Officials’, Anti-Graft and Corrupt Practices Act o Republic Act No. 3019 ug grave misconduct.
Gipasabot usab niini nga usa sa mga basehan sa pagsang-at sa ilang reklamo mao ang mahitungod sa mga pahayag ni kanhi Ako Bicol Party-list Rep. Zaldy Co ug kanhi Department of Public Works and Highways Undersecretary Roberto Bernardo.
Gipasiugda ni Chairperson Teddy Casiño sa Bagong Alyansang Makabayan nga ang ilang pagpasaka sa reklamo usa ka timaan nga ang publiko wala makalimot sa isyu sa korapsyon sa flood control projects.
Gihimug-atan usab niini nga ang Office of the Ombudsman kinahanglan nga moimbestigar ug mohimo og aksyon tungod kay ang mga nagreklamo nalambigit sa Palasyo sa Malacañang, ilabi na kang Presidente Ferdinand ‘Bongbong’ Marcos Jr.
