CEBU CITY- Nakita ni human rights lawyer Atty. Neri Colmenares nga lig-on ang testimonya ni Atty. Alexander Cabrera, ang financial forensic expert nga gipresentar sa prosekusyon sa impeachment trial ni Vice President Sara Duterte, tungod sa mga dokumento ug datos nga gigamit isip basihan sa iyang pag-analisar sa mga transaksiyong pinansyal.
Matud ni Colmenares, lahi ang papel sa usa ka expert witness kumpara sa ordinaryong testigo tungod kay ang iyang testimonya gibase sa iyang espesyal nga kahibalo, kahanas ug propesyonal nga pag-analisar sa mga dokumento.
Gipasabot niya nga bisan pa og kuwestiyonon sa depensa ang kredibilidad, integridad ug pagka-impartial ni Cabrera, angay usab nga susihon ang mga dokumentong nagsuporta sa iyang mga konklusyon.
Matud ni Colmenares, kon adunay opisyal nga mga dokumento nga mosuporta sa mga datos nga gipresentar sa testigo, kinahanglan kining timbang-timbangon sa impeachment court sa paghusay sa mga alegasyon.
Kahinumduman, nga lakip sa mga rekord nga gihisgotan ang mga dokumento gikan sa Anti-Money Laundering Council o AMLC, Securities and Exchange Commission o SEC, Bureau of Internal Revenue o BIR, ug ubang may kalabotang ahensiya sa gobyerno.
Gihisgotan usab sa abogado ang mga pangutana kabahin sa giingong wala maideklarang bahandi, mga transaksiyong pinansyal ug interes sa negosyo nga nalambigit sa bise presidente ug sa iyang bana.
Dugang pa niya, kinahanglan matubag ang mga pangutana kabahin sa posibleng conflict of interest ug sa pagsunod sa mga lagda nga nagdumala sa mga opisyal sa gobyerno.
Bisan pa niini, ang mga alegasyon ug mga konklusyon sa financial forensic expert kinahanglan gihapong susihon sa depensa ug timbang-timbangon sa mga senator-judge base sa mga ebidensiyang gipresentar sa impeachment court.
