PROVINCE OF BOHOL- Nangandam na ang Police Provincial Office sa Bohol alang sa gikatakdang pagbisita ugma ni Department of the Interior and Local Government (DILG) Secretary Juanito Victor “Jonvic” Remulla ug Philippine National Police (PNP) Chief General Jose Melencio Nartatez Jr. sa probinsiya.
Kabahin sa ilang pagbisita ang pagtimaan sa anibersaryo sa magnitude 7.2 nga linog nga miigo sa Bohol.
Matod ni Police Major Joseph Lopena, tigpamaba sa PNP-Bohol, adunay mga kalihokan nga tambongan sa duha ka opisyal atol sa ilang pagbisita sa lalawigan.
Gilauman usab nga makigtagbo sila kang Gobernador Aris Aumentado, mga opisyal sa probinsiya, Mayor Jane Yap, Kongresista Vanessa “Baba” Yap, ug mga mayor sa nagkadaiyang lungsod sa Bohol.
Matod pa ni Lopena, gikatakdang itugyan nila Remulla ug Nartatez ang 50 ka Honda PCX nga motorsiklo ngadto sa mga police station sa probinsiya isip kabahin sa pagpalig-on sa Unified 911 Emergency Response System.
Gilauman nga ipang-apod-apod ang mga motorsiklo ngadto sa 48 ka police station sa mga lungsod ug dakbayan sa Bohol, diin giplanong makadawat og duha ka unit ang matag estasyon.
Pinaagi niini, mas paspas nga makaabot ang mga kapolisan sa mga hiktin nga dalan, mga lugar nga grabeng trapiko, ug mga hilit nga komunidad aron mas dali silang makatubag sa mga emerhensiya ug insidente.
Dugang pa ni Lopena, hingpit nang giandam ang mga lakang sa seguridad alang sa pagbisita nila Remulla ug Nartatez sa probinsiya.
