PROVINCE OF BOHOL- Nadakpan sa kapulisan sa Bohol ang duha ka mga suspek sa pagpangawat sa usa ka karaang brass bell o kampanang hinimo sa bronse gikan sa Saint Peter Parish Church sa Loboc, Bohol, sayong kabuntagon ning Martes, Oktubre 6, 2026.
Ang mga suspek mao sila si Arnold Dalquez, 25 anyos, usa ka scrap metal buyer, ug Quirina Paican, parehong residente sa Purok 6, Barangay Santa Cruz, Sagbayan, Bohol.
Sumala kang Bohol Police Provincial Office spokesperson Police Major Joseph Lopena, nadakpan ang duha alas 1:00 sa kaadlawon sa sama nga adlaw pinaagi sa follow-up operation sa kapulisan.
Nadiskobrehan ang pagkawala sa karaang kampana alas 7:50 sa buntag niadtong Oktubre 5, 2026, human namatikdan nga wala na kini sa entrance sa kombento sa Saint Peter Parish Church.
Hinungdan nga gisusi sa kapulisan ang CCTV footage sa simbahan, diin nakita nga alas 12:05 sa udto niadtong Oktubre 4, duha ka tawo ang misulod sa maong lugar ug gikuha ang kampana.
Gikarga ang kampana ug gisakay ngadto sa usa ka traysikel nga gigamit sa mga suspek sa pagpalayo gikan sa simbahan.
Pinaagi sa pag-backtrack sa CCTV footage ug follow-up investigation, nailhan sa kapulisan ang mga suspek ug nakigkoordinar sa Sagbayan Municipal Police Station.
Narekober sa kapulisan ang gikawat nga kampana sa balay ni Jerry Dardo sa Purok 2, Barangay Libertad, Tubigon, Bohol.
Base sa imbestigasyon, giingon nga gibaligya ang kampana sa kantidad nga P17,000 ngadto sa usa ka scrap metal buyer.
Wala usab mahibaloi sa nakapalit nga gikawat ang maong kampana, busa wala kini giapil sa kaso sa kapulisan.
Ang maong kampana hinimo sa brass o bronse ug adunay marka nga “1914,” busa gibanabana nga kapin usa na ka siglo ang edad niini.
Gipasabot ni Rev. Fr. Agerio Paña, kura paroko sa San Pedro Apostol Parish, nga wala na kini gigamit tungod kay guba na ug adunay mga buak ug liki sa kilid.
Bisan pa niini, adunay gihapong bili ang kampana tungod sa materyales niini ug posible kining mabaligya isip scrap metal.
Kahinumdoman nga nanawagan kaniadto si Padre Paña sa mga kolektor sa antique ug mga tag-iya sa junk shop nga dili paliton o dawaton ang maong kampana kung kini ilang ihalad.
Gihangyo usab niya ang publiko nga motawag dayon sa simbahan o sa kapulisan kung adunay motanyag sa kampana aron malikayan ang pagkatunaw o pagkaguba niini.
Gidala na ang duha ka suspek sa Loboc Municipal Police Station alang sa tukmang disposisyon ug pagpasaka sa kaso.
Atubangon sa mga suspek ang kasong Qualified Theft, sumala sa kapulisan. |With reports of Bombo Rocky Lavarez
