PROVINCE OF BOHOL- Gikumpirma sa kapulisan nga walay nahitabong shooting incident sulod sa Holy Name University o HNU sa Tagbilaran City, Bohol niadtong nakalabay nga gabii, Setyembre 24, 2026.
Matud ni Police Major Joseph Lopena, spokesperson sa Bohol Police Provincial Office, ang report sa giingong pagpamusil mitungha human makadungog og sunod-sunod nga mga pagbuto ang pipila ka mga estudyante nga anaa sa fourth floor sa maong unibersidad.
Tungod niini, dali silang mitawag sa kapulisan aron i-report ang ilang nadungog ug ang gituohang posibleng shooting incident.
Matod ni Lopena, dali usab nga miresponde ang kapulisan ug nagpahigayon og security sweep sa mga andana sa building aron masiguro ang kaluwasan sa mga estudyante, magtutudlo ug personnel.
Apan sa ilang pasiunang imbestigasyon, nasuta nga walay tinuod nga pagpamusil nga nahitabo sulod sa campus.
Nadiskobrehan sa kapulisan nga ang mga tingog nga nadungog sa mga estudyante gikan diay sa usa ka balloon-popping activity nga gihimo sa usa ka klase sa ubos nga andana sa building.
Nasuta nga ang mga estudyante nga anaa sa fourth floor nakadungog sa sunod-sunod nga mga pagbuto gikan sa ubos.
Sa second floor, ang mga estudyante sa usa ka management class nagpahigayon og kalihokan nga naglakip sa pagpabuto og mga balloon, nga maoy hinungdan sa kusog nga mga tingog nga nadungog sa mga estudyante sa taas nga andana.
Tungod sa kalit ug sunod-sunod nga mga pagbuto, nabalaka ang pipila ka mga estudyante ug ilang gihunahuna nga posibleng mga buto sa pusil ang ilang nadungog.
Bisan pa niini, gikumpirma sa kapulisan nga walay na-report nga nasamdan o nabiktima sa maong insidente.
Gidayeg usab ni Lopena ang pagka-alerto sa mga estudyante tungod kay dali silang nakatawag og tabang ug nakontak ang mga awtoridad sa dihang ilang gihunahuna nga adunay hulga sa seguridad.
Apan pahimangno sa kapulisan sa publiko nga magpabiling kalmado ug likayan ang pag-panic kon makadungog og mga tingog nga susama sa pagpamusil.
Gidasig usab ang mga estudyante ug personnel nga mangayo dayon og tabang sa kapulisan o emergency responders kon adunay tinuod nga hulga, apan kinahanglan usab nga likayan ang pagpakaylap sa wala pa mapamatud-ang impormasyon.
Gidasig sa kapulisan ang mga eskwelahan ug ubang establisemento nga magpatuman og klaro nga emergency response procedures ug regular nga drills aron maandam ang mga estudyante ug personnel sa posibleng emerhensiya.
