Tumong sa Department of Education (DepEd) karon ang pag-promote o 100,000 ka mga magtutudlo ug mga school heads sa dili pa matapos ang kasamtangang tuig, isip kabahin sa gipalapdan nga suporta ug reporma niini alang sa sektor sa edukasyon sa nasud.
Gipahibalo kini sa departamento isip katapusan sa School Year 2025-2026 ug ang opisyal nga pagsugod sa usa ka bulan nga bakasyon sa mga magtutudlo sa Abril 1.
Sumala sa DepEd, ang maong target matuman ubos sa Expanded Career Progression System, nga nagtumong sa paghatag og mas klaro ug mas paspas nga proseso sa promosyon alang sa mga magtutudlo.
Kini nga lakang resulta sa sunod-sunod nga mga konsultasyon sa nasud ug mga pagbisita sa mga eskwelahan.
Gawas sa promosyon, giseguro usab sa ahensya nga ang palas-anon sa mga magtutudlo sa klasehanan mahupayan. Lakip sa mga reporma nga bag-o lang gipatuman mao ang pag-usab sa mga giya alang sa pag-obserbar sa klasehanan, pag-apod-apod sa overtime ug overload pay, ug ang hingpit nga pagkunhod sa administrative workload.
Ang gobyerno nagpadayon usab sa pag-apod-apod sa mga laptop ug uban pang mga kapanguhaan sa pagkat-on.
Gidayeg ni Education Secretary Sonny Angara ang mga sakripisyo sa mga magtutudlo sa padayon nga paghulma sa mga batan-on bisan pa sa mga hagit sa sektor.
Samtang, giisip usab sa DepEd ang talagsaong mga nahimo sa mga estudyante karong tuiga isip pruweba sa nagkataas nga kalidad sa edukasyon.
