CENTRAL VISAYAS- Balhog sa prisohan ang 38 la mga indibidlwal human nasikop tungod sa kalambigitan sa illegal nga tigbakay (cockfighting) sa dakbayan sa Sugbo ug probinsya sa Bohol niadtong nakalabayng Semana Santa.
Ang unang operasyon kay nahitabo niadtong Huwebes Santo, Abril 2 sa Sitio Kasagingan, Barangay Guadalupe ning dakbayan sa Sugbo diin 12 ka mga manariay ang nasikop diha-diha dayon tungod sa pagpanari nga way permiso.
Sumala sa Guadalupe Police Station 9 sa Cebu City Police Office (CCPO) nga ang mga nasikop nga mga indibidwal kay giilang sila Alfie Llaguno Ermitanio, 42-anyos; Gleen Cavan Taborada, 50-anyos;
Evaresto Lapera Calora, 51-anyos; Ernie Caballes Labay, 51-anyos; Rodolfo Mainit Cabajar, 61-anyos.
Samtang, wala pud kaikyas ang laing mga dinakpan sa maong panghitabo nga sila si France Rago Galing, 23-anyos; Victor Barreta Jabonillo, 62-anyos; Baito Bulan Ramirez, 63-anyos; Rodrigo Bayon-on Giganto, 67-anyos, Diony Misa Rago, 52-anyos, Victor Situal, 61-anyos, ug si Geronimo Pabro Sabanate, 72-anyos.
Nasikop sa ilaha ang duha ka manok igtatari, set sa buwang, ug kwartang igpupusta sa balor nga P805.
Samtang sa pikas bahin, nakasikop sab ang Bohol Police Provincial Office (BPPO) og 13 ka mga indibidwal tungod gihapon sa illegal nga tigbakay nga gikan pa sa nagkadaiyang dapit niadto gihapong Huwebes Santo.
Sa Barangay Tinago sa lungsod sa Dauis, tulo ka mga senior citizen ang nasikop tungod sa illegal nga kalihokan samtang laing duha ang nasikop sab sa pagpanari sa Barangay Mayuga sa lungsod sa Guindulman.
Laing tulo ang nasikop sa Barangay Camias, lungsod sa Calape, ug duha ka manariay sab sa Barangay Calangahan sa lungsod sa Sagbayan samtang usa ang nasikop sa Barangay Nahawan sa lungsod sa Clarin ang nalambigit gihapon sa pagpanigbakay.
Sa kinatibuk-ang, nakahipos ang BPPO sa dili muminos 12 ka manok igtatari, mga buwang, kwarta igpupusta sa balor nga P2,800 ug uban pang paraphernalia.
Pagtungtong sa Biyernes Santo, 13 ka mga indibiwal ang nasikop sa operasyon nila sa Talibon, Buenavista, ug Dauis diin sila nakahipos sa 10 ka manok igtatari, buwang, ug kwartang igpupusta sa balor nga P1,530.
Mag-atubang ang tannag dinakpan sa reklamong kalapasan sa PD 1602 kung illegal gambling nga pagahikayon sa korte karong adlawa sa Lunes, Abril 6.
