Gamiton sa Philippine Army (PA) ang bag-ong mga kagamitan sa gubat ubos sa 2026 Salaknib Exercises.
Apil niini ang bag-ong mga tangke sa Ascod, self-propelled 155 artillery, Atmos (Autonomous Truck Mounted Howitzer System), ug uban pang kagamitan nga gipalit ubos sa Armed Forces of the Philippines (AFP) Modernization Program.
Bisan ang bag-ong mga AEV (Armored Escort Vehicles) sa kasundalohan sulayan usab sa maong simulation.
Sumala ni Maj. Gen. Michael Logico, ang bag-ong mga kagamitan sa gubat sa PA i-align sa mga kagamitan nga gidala sa US Army Pacific, Japan Ground Self-Defense Force, Australian Army ug New Zealand Army, nga pulos nagpadala og mga contingent dinhi sa Northern Luzon, ang pangunang lugar alang sa mga military drills.
Ang 2026 Salaknib, ang adunay pinakadaghang ihap sa mga sundalo nga miapil sukad nagsugod ang maong simulation.
Kapin sa 7,000 ka sundalo ang moapil gikan sa lima ka nahisgutang mga nasud, lakip ang Pilipinas.
