Sikop sa Land Transportation Office (LTO) Region 7, kauban ang Philippine Coast Guard – Special Operations Task Group (PCG-SOTG), ang 9 ka drayber nga nakalapas sa balaod tungod sa pagmaneho nga hubog sa dakbayan sa Sugbo.
Kini nga operasyon gipahigayon niadtong Abril 11, 2026, ubos sa kamanduan ni LTO Assistant Secretary Markus V. Lacanilao ug sa pagdumala ni Regional Director Wendel C. Dinglasan, aron mas mapalig-on ang seguridad sa kadalanan.
Naka-focus ang maong anti-drunk driving operation sa F. Cabahug Street, Cebu City, diin gipatuman ang Republic Act No. 10586 (Anti-Drunk and Drugged Driving Act of 2013) ug Republic Act No. 4136, diin gawas sa mga hubog nga drayber, daghan pang ubang kalapasan ang natala sa maong pagpanakop, sama na lamang sa 10 ka Unregistered Motor Vehicles, 12 ka paglapas sa RA 8750 (Seatbelt Law), 14 ka paglapas sa RA 10054 (Helmet Law), 2 ka sobra ang karga nga backrider sa motor, 3 ka Defective parts o hilis na nga ligid, ug 4 ka ubang mga kalapasan sama sa obscured plate, verification sa lisensya, ug uban pa.
Sa kinatibuk-an, niabot sa 49 ka Temporary Operator’s Permits (TOPs) ang na-issue samtang 54 ka violations ang narekord.
Ang mga sakyanan nga na-impound gidala na ngadto sa Traffic Enforcement Unit sa Cebu City Transportation Office (CCTO). Hugot nga nagpahinumdom ang LTO sa tanang motorista nga magbinantayon ug likayan ang pagmaneho kon nakainom aron malikayan ang disgrasya.
