Gipahibalo sa Mont Property Group, ang real estate developer nga nanag-iya sa Monterrazas De Cebu, nga mahibalik na sa normal ang operasyon sa development ug construction sulod sa maong eksklusibong subdivision human sa paglibkas sa stop work order gikan sa Department of Environment and Natural Resources (DENR), ug sa wala madayon nga pag-isyu sa Cebu City Council og Cease and Desist Order batok kanila.
Kini human nga gilibkas sa DENR ang stop work order niadtong Abril 6, 2026 nga mipahunong sa tanang mga operasyon sulod sa Monterazzas human sa nahimong imbestigasyon sa maong buhatan aron sa pagsuta sa mga kalapasan niini sa mga regulasyon sa pagprotektar sa kinaiyahan.
Gitataw ni Marie Camille Bondad, General Manager sa Mont Property Group, nga padayon ang kompanya sa pagsunod sa mga rekisitos nga gilagda sa DENR ug uban pa aron nga masiguro nga masunod ang regulasyon nga nagatumong dili lang sa panalipod sa kalikupan apan sa pagprotektar sa mga komunidad palibot sa Monterrazas.
Gipasabot sab ni Bondad nga base sa siyentipikong pagtuon gikan sa University of the Philippines walay direktang kontribusyon ang mga development sa Monterrazas de Cebu sa mga pagbaha nga nasinati sa Liloan ug sa Cebu sukwahi sa nanggawas sa social media ug andam ang mao nga kumpanya sa pag andam og reklamo batok sa mga magpagawas ug pekeng impormasyon may kalabot nila
Mihimo sab ug mga pamaagi ang Monterrazas aron sa pagtabang sa mga naapektohang komunidad palibot sa eksklusibong subdivision atol sa Bagyong Tino susama sa pagpalambo sa drainage system ug pakigsabot sa mga komunidad palibot sa Monterrazas aron malikayan na ang mga pagbaha sa mga dapit diin kahinomdoman niadtong Bagyong Tino pipila ka mga kasikbit nga kabalayan sa Banawa ug Guadalajara ang naapektohan sa baha nga adunay sagol nga anopog nga gikataho gikan sa Monterrazas.
Subay niini, mipadangat gihapon og pahasubo si Bondad sa mga indibidwal nga tumang apektado sa makagun-ob nga kalamidad nga miigo sa Sugbo niadtong milabayng tuig.
Samtang sa pikas bahin, gibutyag ni Engr. Ranil Pelipinosas, construction head sa Mont Property, nga adunay 18 ka mga retention pond ang Monterrazas nga maoy mo salo sa mga tubig uwan nga modagaygay aron di kini molahos sa mga komunidad palibot sa mao nga subdivision. Diin giisip kini nga mas daghan kung ikumpara sa gisaad sa Environmental compliance certificate sa mao nga subdivision. Matud pa ni Pelipinosas nga nagpadayon pa ang construction sa mga retention ponds aron makatabang kini sa pagkontrol sa tubig.
