CEBU CITY- Gisaulog karong adlawa ang ika-149 nga adlawng natawhan sa giisip nga “Amahan sa Sinugboanong Panitikan” nga si Vicente Yap Sotto Sr. pinaagi sa usa ka seremonya nga gipahigayon sa Cebu City Public Library karong adlawa Abril 18, 2026.
Ang maong kalihukan sa paghandom gi-organisar sa Cebu City Cultural and Historical Affairs Office ug sa Cebu City Government, sa pagpangulo ni Cebu City Mayor Nestor Archival.
Gitambongan usab kini sa mga opisyal sa Cebu City Government, Cebu City Police Office, Cebu City Fire Office, ug uban pa.
Si Vicente Yap Sotto usa ka Sugboanong manunulat ug peryodista nga nagtukod sa “La Justicia” niadtong 1899, nga giisip nga unang dyaryo nga gilathala sa usa ka Sugboanon. Usa sa iyang labing bantugan nga kontribusyon mao ang pagmantala sa unang dyaryong binisaya nga “Ang Suga” niadtong 1901.
Nagsilbi usab siya nga representante sa ika-2 nga distrito sa Sugbo niadtong 1922, senador niadtong 1946, ug Mayor sa Sugbo niadtong 1907.
Usa sa iyang labing dako nga kontribusyon sa nasod mao ang Republic Act No. 53 o “Press Freedom Law,” nga nagpanalipod sa mga tigmantala ug tigbalita batok sa pagpugos sa pagbutyag sa ilang mga tinubdan sa impormasyon.
Isip pasidungog, gipangalan kaniya ang pinakadako nga pampublikong ospital sa Sugbo, ang Vicente Sotto Memorial Medical Center. |With reports of Bombo Rexmond Omega
